يا روّاي - فيديو (مكتوبة) - باسم الكربلائي

يا روّاي(مكتوبة)

الرادود:باسم الكربلائي

ارواي آنه الماي سامحني مارويتك
شفتك جاي  يا مولاي   وبدمعتي إتلگيتك

معقوله انت و كلك جاي متعنني أو جودك وياك
أقسم بالكوثر خجلان والواجب آنه أتعناك
بارد صدري أو صدرك حار لاتزعل مني أترجاك
إلمن أجري أو أنفع بيش وبهالحر ما أروي إضماك
يابو الماي والمفروض اوفي ولا وفيتك
شفتك جاي  يامولاي   وبدمعتي إتلگيتك

راسي إبراسك ماخليه مانتقارن راس إبراس
وي غيرك آنه السلطان بس تحت إجدامك عباس
ترميني من جفوفك ليش وحجايه أصبح بين الناس
لو شاربني إهوايه أرتاح جا ما أتعاتب أنباس
ياعطشان يازعلان حقك لأن ماجيتك
شفتك جاي  يامولاي   وبدمعتي إتلگيتك

حجمي أو حجمك ماينقاس وانت الأكبر مني إهواي
آنه إجبير إبعين الناس بس مابين وانت أوياي
من تگعد أوگفلك روج ومن توگف تترسني إفياي
أدعيلك ترجع بالجود وظليت ألعن كل رماي
خوفي إعليك ليغدروك رد للخيم ناديتك
شفتك جاي  يامولاي   وبدمعتي إتلگيتك

من طحت امن ايدك لليوم أشعر بالخيبه وخجلان
ماريد إيسموني الماي كون إيسموني العطشان
لا آني الطفيت إخيام ولاشربت مني الرضعان
و لا أگدر أفزع وياك من طاحت منك ذرعان
رغم الصار ياوفاي ترجع الي إتمنيتك
شفتك جاي  يامولاي   وبدمعتي إتلگيتك

أتعجب تعطش مولاي و ينشاف إبگصتك نهرين
واني إشما أغلى و أنهاب ما أسوه إظفر بالجفين
لازم ماطيح امن الجود بلكت يشرب مني حسين
بس ياحيف آنه إتبديت و فرحت الشامت مرتين
عالغدار واگف وين سامحني ما دليتك
شفتك جاي  يامولاي   وبدمعتي إتلگيتك

من آنه وعبد الله يصيح يتعنه إعليه من إبعيد
من آنه الرويت إخيول وست إشهور إيمدلي الإيد
كون أتحول تل إتراب لو شي لاضر و لا افيد
ولا أنظر عبد الله إيموت ولا راح من حسين إعضيد
والأعذار بيش إتفيد وبهالوضع خليتك
شفتك جاي يامولاي وبدمعتي إتلگيتك

آنه أعرف لو جن اليل زينب تتعناك إدموع
الله إيساعدها امن اتشوف راسك والجف المگطوع
يسكت كلشي إبذاك الليل بس مدمع زينب مسموع
ميت لكن أشعر بيك وي إختك تنحب وتلوع
والجرفين تبجي إعليك يافشلتي أذيتك
شفتك جاي يامولاي وبدمعتي إتلگيتك