هم راح - فيديو (مكتوبة) - باسم الكربلائي
هم راح(مكتوبة)
الرادود: باسم الكربلائي
هم راح يوصل ضعنهم
والناس تتبره منهم
هم راح توگع حرمهم
والنار تحرگ خيمهم
خيمهم .. خيمهم
محرم هم اجه وزينب شريط الهم تعيده
نفس كل مرة متعودة تظل بالطف وحيدة
زمان اغبر يخليها على الكافل بعيدة
عجب ما يمشي وياها الگبل تمشي بوريده
زينب تنعى بمغيبه
زينب جرح المصيبة
زينب صبرچ عجيبة
زينب تمشي غريبة
بعدهم .. بعدهم
على شاطي النهر باچر اخو ينادي على أخيه
يگله أدركني محتاجك بقيت ابلا اديه
ويرد وزينب اتگله گضت يابو رقية
عگب عباس ابو فاضل منو العينه عليه
باچر يفگد خليله
باچر تبچي العقيلة
باچر صدمة ثگيلة
باچر رحلة طويلة
حزنهم .. حزنهم
قريباً جداً نشاهد أبو يودع بناته
يحط إيده على ظهره ويسندنه خواته
أبو مبين عليه فاگد ولد ماكو ابحلاته
يحاول يكتم العبرة ويذكرونه الشماتة
وحده وما عنده ناصر
وحده ابين العساكر
وحده تسحگه الحوافر
وحده من الخيمة الـ آخر
طعنهم .. طعنهم
مثل كل عام أبو اليمه يشيلونه بحصيرة
ويصيح الجاني للحادي أخذ زينب أسيرة
وتفر والحادي يلحگها غريبة ابلا عشيرة
تره مو سهلة من تركض المرية الجبيرة
ساعة ينطگ متنها
وساعة اتدوس اعله ابنها
وساعة تموت ابحزنها
وساعة تخلي ابحظنها
جثثهم .. جثثهم
مثل ليل اهدعش ماكو ألم بالدنيه كلها
تخيل تنضرب طفلة لأن تبچي على أهلها
تخيل حرمة مجتوفة وجمر يحرگ رجلها
تخيل أم يگابلها شخص ذابج طفلها
واحد يأمر عليهم
واحد يتشفه بيهم
واحد يچتف إديهم
واحد يشتم نبيهم
وأهلهم .. وأهلهم
إذا واحد يگوللكم شنو معنى الخسارة
أرسموله مرة امشيبه تطب قصر الإمارة
وكت خله الـ بلا غيرة يسولف بإنتصاره
طلع صوته الگبل يركع إذا شاف الغيارى
دنيا الشارد يهاجم
دنيا اتغيب الهواشم
دنيا اتبچي الفواطم
دنيا ما يبقى سالم
شملهم .. شملهم
اليعذبني ويموتني ويخلي المشهد أقسى
غريب ويلطم الوحده الإمام المهدي هسه
خطيه الما يواسونه يظل يواسي نفسه
حزن مزمن حزن گلبه وعذابه ابلايه مرسى
عايش بالغربة وحده
عايش ويبچي على جده
عايش ومتاني وعده
عايش بچفوفه بعده
علمهم .. علمهم
التعلیقات