بداية ويل | استشهاد أمير المؤمنين (ع) (مكتوبة) - باسم الكربلائي

 

بداية ويل .. جنازه او ليل
حديث ايدور واتسمعه زينب
خطر عاشور هالليله گرب
بداية ويل .. جنازه او ليل

روايه او ما سمعناها او حوادث إلها ما شفنه
ابعجب مقرون .. إمام الكون
علي مدعاة للحيره يخلي ابكل عگل صفنه
يموت اشلون .. إمام الكون
ويبقى وجه ربك ذو الجلال او ما سواه يفنه
أمر ما دون .. إمام الكون
علي مو أي بشر هوه سكن ونه او غمض جفنه
اختلف مضمون .. إمام الكون

الأجل ناداه .. يوجه الله
ابجنازه اتفوت يم العقيله
او رغم هالموت ونتك ثجيله
او دمعتك سيل .. جنازه او ليل

جنازه امحمله ابهيبه لعد مثواها تتقدم
علي او ينشال .. صعب هالحال
اليره والما يره يبچي ابخفاء اصوات تتكلم
حزن واهوال .. صعب هالحال
ابهضمها شيعت زينب أبوها والدمع سلم
سلام اجلال .. صعب هالحال
الأبو مشيول بس گلبه وگع يم بنته يتألم
صدگ من گال .. صعب هالحال

مدامع حيف .. أحد من سيف
الذي ميهاب يوم الكلايف
دليله انصاب واعليها خايف
اليعدل الميل .. جنازه او ليل

جره التشييع لن زينب دمه أجرت محاجرها
او عيون اللوح .. عليها اتنوح
محط انظار للوعه صفت الله يصبرها
جماد او روح .. عليها اتنوح
الطبيعه اختل توازنها او بچت أربع عناصرها
ابنظر مشبوح .. عليها اتنوح
هوا او نار او تراب او مي علي تترجه يعذرها
ابفعلها اتبوح .. عليها اتنوح

اعتراف او آه .. العذر ترجاه
حچتله اشلون هاي العناصر
ابخدر أم عون شتسوي باچر
تهد الحيل .. جنازه او ليل

بچه الماي ابدفن حيدر نمير انرش على گبره
يصيح الماي .. شگول ابهاي
وفيت اوياك بس بالطف أخلي ابكل گلب حسره
يشح مجراي .. شگول ابهاي
يتامه اعليه تتلظه او أعطش زينب الكبره
رهين اعداي .. شگول ابهاي
او شبيهك من يجي او يفزع يرد لا يمنه لا يسره
العذر مولاي .. شگول ابهاي

او يظل احسين .. ابضمه للبين
اشيصير اعليه ماريد ازعلك
الشمر يلفيه شحچي او شگلك
بلا تفصيل .. جنازه او ليل

ابمشاعل خطة المدفن حچت هالنار تتأسف
أبث اخبار .. واقدم اعذار
تراني ابغارة العسكر أجي او أحرگ خيم بالطف
بلا إنذار .. واقدم اعذار
علي ابناتك خل ايفرن ترى لو وحده تتخلف
تصلها النار .. واقدم اعذار
سلاما يا عسه او بردا أنا وابزينب اتعطف
ولا تحتار .. واقدم اعذار

تطفي اخيام .. تلم ايتام
اشكثر صرخات تلحگ عليها
وانا ابچويات أحرگ إديها
لهيب او خيل .. جنازه او ليل

الهوا ابمنطق نذير الهم نطق هالليله من حگه
وصف أحزان .. دمه او دخان
علي ابفگدك نفس زينب ثگل لاچنها بالشهگه
النفس ما چان .. دمه او دخان
أهب عصرية العاشر أطب ريتها مختنگه
غصص واشجان .. دمه او دخان
أشممها عطر منحر شمر من الگفه ايمزگه
او يرفعه اسنان .. دمه او دخان

او مهب الريح .. حسين ايصيح
أمر اجساد وانقل نفايح
على الأوهاد ظلت ذبايح
بلا تغسيل .. جنازه او ليل

التراب الداسته زينب بده الوالدها يتعذر
حچه ابتبرير .. أسيره اتصير
أميره التمشي عن گاعي تجي او مو عجبه تتعثر
ابحبال اتسير .. أسيره اتصير
بعض هالكوفه يتشمت بعض للحاله يتأثر
عليها اتشير .. أسيره اتصير
غباري اعله العبي يعله وابد ما يسعد المنظر
حرم واتحير .. أسيره اتصير

تطب وفاد .. على ابن ازياد
تمر ايام صعبه او حزينه
او زجر للشام يحدي الظعينه
سبي او ترحيل .. جنازه او ليل

العقيله اتنهدت تالي او نظرها اعله الگبر يربي
لفتها اعلوم .. أمر مقسوم
يبويه اتگله ليهمك تراني مستعد گلبي
الهذاك اليوم .. أمر مقسوم
أنا ارباتك فلا تخشى المهابه تفترش دربي
اعله رغم الگوم .. أمر مقسوم
فقارك شلته بلساني او إلاهي ابكل خطر حسبي
الرزايا اتحوم .. أمر مقسوم

ربيبة حيد .. أذل ايزيد
العدو هيهات يمحي ذكرنا
الوحي ما مات باقي ابأثرنا
بني التنزيل .. جنازه او ليل