صرنا جرح - فيديو (مكتوبة) - باسم الكربلائي

 

 

صـرنه جـرح يشبـه جـرح
آنه ابـمتـن وإنتـه ابـرمح

مسبيـه نمشـي ومنـذبح
مسبيـه نمشـي ومنـذبح

گدامي راسك عالرمح
وانه اشكي من امتوني
كلما يضريون المتن
يم راسك أيودوني
شلونك گلتلك ع الرمح
يالما سألـت اشلوني
إعيونك غفـه بيها رمـل
وآنه السهر بـعيوني

هـالحالة بس مانفترگ
يالخـوتك عِـشرة صدگ

مسبيه نمشي ومنذبح
مسبيه نمشي ومنذبح

حاچيني يـالغافي ابجرح
ومسهر إعيون اختك
يالما عفتني ويه السبي
لا آنه خويه العفتك
گتلك ولا عندي عتب
وبـفرگـتك عاذرتك
اعذرني لو الطم يـخي
لو مال راسك شفتك

وبروحي ألومن وأنجرح
لو مال راسك بالرمح

مسبيه نمشي ومنذبح
مسبيه نمشي ومنذبح

من السيوف أتغيرت
وبگلبي ظليت إنته
بس رايده اتسولف علي
موحلوة هيچ السكته
حركـلي راسك عالرمح
لو گلت ذبلت شفته
بالموت لو عندك عذر
آنه ابـوداعـك ميته

من گتلي آخر ملتقه
عمري على دربك بقه

مسبيه نمشي ومنذبح
مسبيه نمشي ومنذبح

لو صدرك ابدرب السبي
چا سولفت ع الداسك
وشما أصد اعله الرمح
ما باقي من انفاسك
بمتوني شمخالي السبي
شمسوي خويه ابراسك
كلما اطيح من الظعن
يكبر جرح بإحساسك

يضربوني وبإسمك صحت
واتذكرت إنته متت

مسبيه نمشي ومنذبح
مسبيه نمشي ومنذبح

جرحك مثل جرحي صبح
واليوجعك يوجعني
چا ليش كلما سولفت
وياك ماتسمعني
وياك اجيت امن الوطن
بس ياهو اليرجعني
ما بيه حيل اعله المشي
حته الهوه ايوگعني

وتحملت گلبي انگطع
يس خوفي راسك لا يگع

مسبيه نمشي ومنذبح
مسبيه نمشي ومنذبح

ياخويه بعيوني حچي
هالحاله كلما المحك
هاي آنه مو گد فرگتك
والرمح موگـد جرحك
واليضرب امتوني ابقصد
مرتين راد ايذبحك
لو تدري چم مره متت
كلما اگنابل رمحك

هم تدري بدروب السبي
متني صفه ابلون العبي

مسبيه نمشي ومنذبح
مسبيه نمشي ومنذبح

 

للشاعر: محمد العقابي