يُّمه أطمنج عليه...قطعتّهن ايديه - فيديو (مكتوبة) - باسم الكربلائي

قصيدة : يُّمه أطمنج عليه...قطعتّهن ايديه

للشاعر : إيهاب المالكي

الرادود : الحاج ملا باسم الكربلائی

يُّمه أطمنج عليه...قطعتّهن ايديه
وفيتج بعيني...جفيني...و اسنيني...يم المشرعة
يا حره ربّيتي...و ضحيتي...و انطيتي...لحسين أربعة
******
اطمئني و آنا جايبلج خبر زين...أربعتنه يُّمه رحنه فدوه لحسين
من تسألين اعله روحي و النفس وين...روحي يُّمه للأخوة وفّت الدين
صوغتي من الطف ييُّمه دني الأثنين...خبر قطع اجفوف ايديه و نبلة العين
يُّمه ولدج نِشامه...ما رجعنه بسلامه
آنا أوصي بخواني...بإيماني...و امتاني...ما واحد يظل
و الخاطر العِشرة...و العترة...و الزهرة...نتقطع وصل
و آنا آخر منية...قطعتّهن ايديه
******
أحمد الله يُّمه صدري خلّص أنفاس...روح صعدت للسمه وياها حُراس
انتي خليتي المنية عدنه مقياس...قلتي تنذبحون لازم و أرفع الراس
جان راية أرواح اخوتي يوصل إحساس...لأمنه قالوا و اليوصله انت عباس
حملّوني أمانة...رفعي راسج ورانه
شلتي الصبر راية...و الغاية...من هاية...دين المصطفه
بيه الجمر ضوّه...للنخوة...و الخوة...بعده ما طفه
من خذتني الحمية...قطعتّهن ايديه
******
آنا أوصيج بوصية يالأصيلة...يُّمه ودي لي سلامي للعقيلة
آنا أدور الصبرها عن مثيله...من سبوها ما كو واحد تشتكيله
هي تدري بالكفالة مو قليلة...و آنا أدري عقبي هية هم كفيلة
يُّمه لآخر عمرها...آنا حارس خدرها
آنا العرفوني...وصفّوني...سمّوني...سبع القنطرة
يا يُّمه واسيها...طمنيها...بلّغيها...عني المعذرة
عني راحت سبية...قطعتّهن ايديه
******
من تلّقيت السهم و انطيته دمي...قلت له من تنذبح نظرتي آنا سمي
قلت له راح أكتب خلودي و أجلي همي...يا سهم و الدم مدادي و انت قلمي
السهم حيّر فضوله هذا عزمي...قلت له أريد بهذا موتي تفرح أمي
اشلون أضيع رباها...الله يرضه الرضاها
هاي اللي بأفكاري...بإصراري...و الباري...إلها جنّته
و اشلون ابن حيدر...يتعّذر...ما يقدر...و أمه اتخنته
عالعهد يالأبية...قطعتّهن ايديه
******
آنا عند ظنج ييُّمه شوفي قدري...حسين قلي من أتركه أحني ظهري
عندي منزلته ييُّمه بيها يدري...هوه أخويه و هوه إمامي و هوه ذخري
نحره من انحز ييُّمه قبله نحري...صدره من انرض ييُّمه قبله صدري
صاح من طاحت ايدي...راح أخويه و عضيدي
شفته انخطف لونه...و اعيونه...واجفونه...غرقت بالدمع
و إقبال شمّاته...آهاته...حسراته...صارت تنسمع
ردت أدي التحية...قطعتّهن ايديه
******
إنتي مو بس امرأة و حيدر رضاها...جان نسّاب العرب يعرف أباها
غيرتج محد عرف سر محتواها...وين أكو مثلج مرة اتضحي بظناها
سيرتج من يدري بيها الما قراها...يقول ماتت فاطمه و الله حياها
ما تُمرني الهزيمة...و أمي هاي العظيمة
انتي الوره أفعالي...و ببالي...للتالي...بسمج أفتخر
يا نور القلبي...و بدربي...من حربي...جايبلج نصر
هذا نصرج هدية...قطعتّهن ايديه
******
آنا ضامي ما تركته جمري يخمد...اشلون يم نيران زينب قلبي يبرد
روحي جفت بس ضميري شفته ورّد...و النهر من عاينت له بيه ما صد
متت ضامي ما شربته ربي يشهد...آنا هسه يُّمه قاعد يم محمد
قلي اخذ البشارة...صار جفج منارة
لمن تلقّاني...ضمّاني...كنّاني...راعي الأوله
شفته ابتسم قائل...يا كافل...تستاهل...قبة بكربله
هاية ثمرة قضية...قطعتّهن ايديه