قصيدة : نزلت آية الأحزان

للشاعر : ناظم الحاشي

المناسبة : رثاء الامام الحسين (ع)

الزمن : ليلة 22 محرم 1440 هـ

طور : بين_المهدي_والعباس

حسينية الحاج داوود العاشور

نزلت آية الاحزان

من نحرك على صدري

و العاشر شهر رمضان

و الطف ليلة القدر

يا منحر .. قد كبر

بالطف للسموات

*****

انته اعرف .. يوم الطف

نزل امر الشعاير من نزف نحرك

قدمنه .. و ابدمنه

طعناها الشعيرة الواجبة بأمرك

كعبتنه .. رايتنه

ادينه المناسك كلها يم قبرك

صرختنه .. دمعتنه

كلمن طعن بيهن يطعن بظهرك

يحسين الشعاير هاي

خط احمر حجيناها

لو تسكت دعاة الراي

لو نزعل تره وياها

بل نشهد .. بالمُنسد

نزلت بيها آيات

*****

حبيتك .. واليتك

بأحساس المشاعر عندي هيج احساس

اقسملك .. لو قتلك

بقد حب الزجية يحبك العباس

من فخرك .. من صبرك

دم نحرك الطاهر شرّفك عالناس

يا ثورة .. يا عبرة

راس الحاربك يحتاج قَصّةْ راس

كلمن حبك و والاك

يعرف قدرك العالي

يا غالي و لجل عيناك

لجلك يرخص الغالي

يا معبر .. للكوثر

يا ركن العبادات

*****

مو طبعي .. يا عمري

شلون انساك و انسه القاسم و اصبره

و اشهدله .. من مثله

ختم عقد الزواج بمحكمة نحره

و يخسرك .. يغدرك

تره الحرّم عليك اللوعة و العبرة

لمصابك .. بأحبابك

اول دمعة طاحت دمعة الزهره

طاحت دمعة العينين

من جدك حجه القصة

قال يظل وحيد حسين

بالطف مذبحة تخصه

و المهدي .. من ولدي

ياخذ بأسمه ثارات

*****

من مهدي .. عن جدي

ابوي اعله الحزن من صرت ربّاني

من زغري .. والقبري

خلص عمري و طعم عاشور بلساني

ظل صوتي .. و الموتي

ما ابدل يقيني و ثابت ايماني

شيعيتي .. قدسيتي

بعد قرآن ربي حسين قرآني

من زغري و حزن عاشور

يلجم كل سنة جروحي

يرجع و السنين تدور

و الطم و احرق ابروحي

تأبيني .. لحسيني

ما عوف الزيارات

*****

ما خفنه .. تعرفنه

و انقيم الشعائر جنه بالبسكوت

بالفترة .. و الخطرة

اليكتب يا حسين اعله الجدار يموت

لعيونك .. من دونك

لا عشنه اويه اهلنه و لا سكننه بيوت

وفينه .. تدرينه

حبينه بوكت جان العشق تابوت

حبينه بزمان البيه

الحبك ينكتب موته

صحناك بوكت تدريه

محد ينسمع صوته

رحنالك .. و صحنالك

حبك بينه ما مات

*****

فهمونه .. حاجونه

انتم يالبليتوا اهل اللطم بلوة

ربتنه .. خطوتنه

من زينب خذينه للطم فتوة

عالغالي .. عالوالي

ما عدنه ابد غير الدمع سلوه

تاليها .. ندريها

دنيه بغير حب حسين ما تسوه

دنيه بلا هوى المحبوب

ما نشعر طعم بيها

جرب كل مسية غروب

روح الزينب ادعيها

مـتردك .. و تعدّك

من اهل الكرامات

*****

لأيتامك .. وآلامك

هاي دموع زينب رسمت الصورة

عبرتها .. دمعتها

و بخد الزمن لليوم محفورة

لوعتها .. شافتها

راس اعله الرمح و جفوف مبتورة

و بحرقه .. عالملقه

صوت يريد ثار اليوم العاشوره

كل صوت اليداعي بثار

زينب باركت صوته

و السكتت على اللي صار

عدله و تنحسب موته

قد ناحت .. من صاحت

لا للذلة هيهات

*****

بأحساسك .. عباسك

قمت لأنته الشعيرة الاولى عالمصرع

من حبنه .. تعرفنه

نبجي اعله القمر كلما قمر يطلع

رحناله .. و قلناله

كون يصير الك بجفوف نتبرع

ما ترهم .. يا ضيغم

و انته جفوف اسد و جفوفنه مشمع

ما ترهم عليك جفوف

غير جفوف حامي الجار

و ايدك ما تشيل سيوف

الا بوزن ذو الفقار

يالحبك .. عد ربك

للوادم جوزات

تعليقات

لإرسال تعليق یجب أن تسجل في الموقع

ملفات فيديو

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x