ليلة 8 محرم 1441هـ

قصيدة : ردتك ييمه العازتي
للشاعر : عمار هليل الواسطي
المناسبة : ليلة 8 محرم 1441ه
المكان : ديوان الكفيل لندن

ردتك ييمّه العازِتي
جسّام يا ضي عيني
*****
نذرت سنيني الك يوليدي ربّيتك
وبوسـط الگلب يا الغالي خليتك
تجازيني مثـــل ما آني جازيتك ؟
تدري الكربله يعيوني ظميتك
ناذرتك العمّك نذر
وبكربله توفيني
جسام يا ضي عيني
*****
حگ إرباي تدري إشلون يتجازه
دمك للحسيـــن يوفّي كل عازه
يَمَن حبك الگلبي والنفس حازه
تجي روحك إلي وتشيل الجنازه
لو خلص عمري يالولد
برويحتك تلفيني
جسام يا ضي عيني
*****
يبني بكربــلــه بدمـاك تتحنّه
جابوك وثگيله بمهجتي الونّه
بالگوّه اعله جسمك يبني أتدنّه
رگد حيلي وردت كل عمري أودعنّه
شمّيتك وشفت الدمع
ياسلوتي يچويني
جسام يا ضي عيني
*****
وصيّه امن الحسن موتك اليفجعني
أنذرك للسيـــــوف إلّي تگطّعني
كفو منك ييمه اوليدي تسمعني
يرفعة راسي أودعك هم تودعني
تسمعني ريتك ياشهم
يا جاسم تباريني
جسام يا ضي عيني
*****
أعوفك مو بديّه الشام تتنطر
أعوفك وانسبي وبعمري أتكدّر
يجسام ودليلــــــي مثلك إتوذر
عرسك صار نوح وفرحتك منحر
حنّيت چفّك بالدمه
ودموعي التواسيني
جسام يا ضي عيني
*****
حقهه الوالده اعله الولد تتألم
وآني بگلبي تسعر نار المخيّم
صيوانك أذكره ودمعتي من دم
إذا مو بيك بيمن يالولد أحلم
انته بمنامي ويقظتي
ياظنوتي اتحاچيني
جسام يا ضي عيني