عفتني
calendar_month 2021-09-01 play_arrow 200 الاستماع

عفتني - مكتوبة

الشاعر : السيد عبدالخالق المحنة

 عفتنــي وحيــده .. وچفــوفك بعيــده
******
يالربيت ابروحي تتغذه بحناني
انظر ابوجهك واگلك زينب اني
واكبرت وانه اكبرت والهم خذاني
تالي هذا انته التركني وما اجاني

يرابـي، اعله اديـه، حضـورك، أريــده
 ******

من اباوعلك قبل يعرگ جبينك
والهوى لو مر عليه اتخزره عينك
يالچنت تمسح اثر جدمي بيمينك
هسه وين انـه يخـويه وانته وينك

سطـرني، زمـاني، وسطـرته، شــديده
 ******

مره طاحت دمعتي وثارت حميتك
هسه شو طاحت امتوني وما لگيتك
انته وين ابعازتك صارت منيتـك
دارو عليه وتغشيت ونخيتــك

گلـتلي، ابحـمايه، گلتــلك، أكيـده
 ******

ها يمن دگيت صدرك للحمايه
هسه ناس اهوايه گدامي وورايه
واحد ايأشر للآخر هيه هايه
ام خدر چانت صفت ام السبايه

كسـرها، دهـرها، بأخـوها، وعضيـده
 ******

سكنه صاحت يابو فاضل من ألمها
والسـلبها سب ابواليمه وهضمها
گتله ياظالم احذرك تدنه يمها
گلي ها وينه كفيلچ وينه عمها

يگــلي، كفيــلچ، گطــعنا، وريــده
 ******

من اجيتك للنهر مو بالسهوله
خوفي من ذوله يشوفوني وهذوله
من وصلتك حيرتي شنهو الأگوله
خاف اشوفك مستحي وانه خجوله

نحيبــي، يجــرحك، واعيـده، واعيـده
 ******

كل هضيمه وكل مصيبه اتوقعتها
بس وگعتك ع النهر ماحسبتها
طلعو زينب كلمه گوه اتحملتها
صعبه تطلع اختك الانته جبتها

اقـلل، عتـابي، ونينـي، ازيـده
 ******

انته هذا التارس الدنيه ابحنانك
مو مكانك هذا يم سكنه مكانك
خايفه وماكو امان ابگد امانك
تنظر زينب عالهزل رادك زمانك

دريــت، السلبنـي، يكثــر ، وعيــده
 ******

حتى ظلي چانـت الوادم تهـابه
هسه شافوني وانه اعليه رقابه
انته وينك والعدو صفه حسابه
الما تموت امن الضمه اتموت ابخرابه

قديــماً أميــره أسيــره جـديــده
 ******

راح اروح وعيني تتنطر علامه
يعني ماتگدر تگلي بالسلامه
راح اعوفك وامشي للرضو عظامه
بلكي يگعدلي وافرح هاليتامه

وافــرح، سكـينه، ورقيـه، وحميــده

تعليقات

لإرسال تعليق یجب أن تسجل في الموقع

شاهد حقيقة - محرم الحرام 1443

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x