شيخة عشيرة
calendar_month 2021-09-01 play_arrow 186 الاستماع

شيخة عشيرة - مكتوبة

الشـاعر : الأدیب أحمـد ااذهبـي

 

شيـخة عشـيرة .. كـرمها مغـطي عيـني
هيبـة أمـيرة .. فـضلها ابـگد سـنـيني
باقة شُــكر . من علـي الـبوة علـي
سـيف ودرع . بالحــرب صـارت إلـي
******
اسولف قصة الشيخة، كريمة المانكر واحد فضلها
بعد ماداهمـوا داري، وابوفـلان ابحقد ناره شــعلها
وحق العايشة بروحي، القـبل ماتـولده إستشهد طـفلها
دفنت الزهره والعشرة، گـلت وين الگه بالعالم مثـلها

زينب يتيمة وحـزنها اشسوه بيه
صاحت يـبوي بعدها اشيـبقه ليه

راح الحزن والفرح طب منزلي
سيف ودرع بالحرب صارت إلي
******

عثرت مسحته ابابي، عظيمة وتعرف الزهره اشـعظمها
تشوف افراشها الخالي، تصد البابها وتشعر بألمها
حنينه ابگد وفه البيها، بچت گد مابچت زينب على امها
واسمها اتنازلت عنه، عجيبه ويا مره اتضحي بإسمها

طِيبة وترافة كأنها من الله جَـنه
رادت تضحي بإسمـها قُـربة إلنـه

گـول وفِـعل تستـحق زَوجة ولـّي
سيف ودرع بالحرب صارت إلي
******

تسـمّي سيدي الغالي، الحسين ودومها اتقدمه اعله ابنها
تعرفه المالك الشرعي، اشتراها الجنة والمنـحر ثمنها
وانـه ادري اشگالت الـزينب، ابتسمت ساعة الهمست بـإذنها
نطتها ابـشارة بالقادم، گُـمرها الفارس الكافل ضعنها

عندي هدية شلتها الباقي عمرچ
فارس مُقاتل نذرته يحمي خدرچ

هـذا الگُـمر بس إلـچ وتـدللي
سيف ودرع بالحرب صارت إلي
******

اسمعتها اتـگلها بعد امچ، دعيتي والله مارجع دعوتچ
تراني الخاطر اعـيونج، أجيب اربع ولد كلهم فدوتچ
وإذا مسـموحلي اتـرجل، واجيچ اوياهم ابساعة نـخوتچ
يبعد اليخفگ ابصدري، فداچ انا وهلي واربع اخوتچ

تدري بأواخر عُمرها اتضل غريبه
بعيده عليها وعليها اشگد قريبه

انـطي اربعة ولو يصـح انـطي هـَلّي
سيف ودرع بالحرب صارت إلي
******

تجـي لحـسين متقصـده، تخلي ابحـضنه ابوفـاضل تنـومه
تريد اتـگله من يـوگع، تجي وبحـضنك اتشيله وتشمّـه
ولكن من يذبـحونك، منهو اللي يـجي ايـحضنك يـيمه
والاصعب والاشد زينب، تشوف اليرفس اصوابك يلچمه

وينك تنادي بـچـتني اعـيوني دمـعـه
طولك يغـالي على امك ماله رجـعـه

فـاض الدمع والحـزن ماينجلي
سيف ودرع بالحرب صارت إلي
******

فعلها امبين من الطـف، لبنها امغزر الجابت غياره
لوما رادتها الباري، مناية اولادها ابحكمة قراره
چان المعركة اندارت، رجال وخـيل جابوهم يساره
حنينه وغذت الخوه، ولدها الاربعة الثبـتوا جداره

راعي الكفاله ابسـمّـها شفته كوكب
روس الخـيانه عليهن سـيفه يلعب

فوگ السمه ابـكربله ضل يعتلي
سيف ودرع بالحرب صارت إلي
******

نادت من شمر ثنه، اعله صدر حسـينها گلبي لچمني
صـاحت ياريتني امـّيه، گبل لا ينـذبح ضامي شربني
بعيده وكربله ابروحي، احس اخيولهم داست على إبـني
خفت من رفة اعيوني، رجيـف اضلوعي والمشهد رعبني

خوفي يروحي گمرنا ابـلا سـلامه
زينب وحـيده وبنات إبـني يتـامه

بيـمـن بعــد تنتــخي من تنـولي
سيف ودرع بالحرب صارت إلي

تعليقات

لإرسال تعليق یجب أن تسجل في الموقع

شاهد حقيقة - محرم الحرام 1443

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x