قصيدة : بده ما ينسمع صوتك

للشاعر : سيد عبد الخالق المحنه

 ليلة ٢١ شهر رمضان ١٤٣٩هـ

حسينية داود العاشور /البصره

بده ما ينسمع صوتك

مشه صبري وگرب موتك

يبويه يبويه

بعد ساعه ويشيعونك

بعد ما اسأل شلونك

يبويه يبويه

*****

تريد تروح مثل الي يروحون

بلا خيمه اليحبونك يظلون

اذا شفت الدمع أحمر بالعيون

على كثر الدمع جرحت الجفون

يبويه عاين وريدي .. واريد تگلي يوليدي

يبويه يبويه

وداعك شفته بعيونك .. بعد ما اسأل شلونك

يبويه يبويه

*****

بقه حيدر يباوع نحر الحسين

وأبو فاضل قريب ويهمل العين

بقه هواي يركز على الچفين

يصد لزينب يگلها الوجه وين

تگله يا ضوه عيني .. يتيمه لا تخليني

يبويه يبويه

شسوي بعمري من دونك .. بعد ما اسأل شلونك

 يبويه يبويه

*****

يباوع زينب الظلت بلا روح

يبويه بكربلا تنتظرج جروح

كفيلچ عالنهر وحسين مذبوح

على صدره ترد الخيل وتروح

يبويه خيولهم عشره .. تشيل ضلوعه من صدره

يبويه يبويه

تگله خل يسمعونك .. بعد ما اسأل شلونك

يبويه يبويه

*****

يبويه حسين خليني أخبرك

طفل عندك يذبحونه اعله صدرك

كأني بيك ما واحد ينصرك

أشوفك عالشريعه ومحني ظهرك

وأبو فاضل نطى كلمه .. اظل خادم لبو اليمه

يبويه يبويه

وأخليهم يذكرونك .. بعد ما أسأل شلونك

يبويه يبويه

*****

يزينب هم اريدنچ تسمعين

تره بالطف أحضرچ من تنادين

شمر لو شال سوطه لا تخافين

إذا طاحت متونچ لا تطيحين

تگله صدك يدنولي .. يشوفون الزلم طولي

يبويه يبويه

يشوفون اليبغضونك .. بعد ما اسأل شلونك

يبويه يبويه

*****

يگلها اليوم إسمچ هاشميه

تره بالطف يسمونچ سبيه

وأخبرچ من بعد هاي الزريه

يسيره مگيده بديوان أميه

تسمعه وگامت وطاحت .. دخيلك ياعلي صاحت

يبويه يبويه

إذا بالطف يذبحونك .. بعد ما اسأل شلونك

يبويه يبويه

*****

يبويه حسين جسمك من يوذروه

ثلث تيام يبقى ما يواروه

يغالي وخنصرك حتماً يبتروه

بعد عندك علي بالطف يطبروه

علي الاكبر اله وگعه .. تشبگه وتنحب وتنعه

يبويه يبويه

ضميت وما يروّنك .. بعد ما اسأل شلونك

يبويه يبويه

*****

يبويه في أمان الله يالأحباب

تسلمولي على الظلو على الباب

يتامه ومن يعزيهم بالمصاب

إذا سألو عليه گولو ما طاب

إذا سألوكم شلوني .. إريدنهم يشيعوني

يبويه يبويه

يتاماك ويحملونك .. بعد ما اسأل شلونك

يبويه يبويه

تعليقات

لإرسال تعليق یجب أن تسجل في الموقع

ملفات فيديو

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x